Uluk nanain hau hakarak hato’o agradese no obrigado ba Aman Maromak tamba nia grasa no kbiit mak bele fo biban ba ita hotu hodi partilla ba malu kona-ba Plataforma Website ne’ebé sei lansa baseia ba kooperasaun entre Ministériu Edukasaun no Sekretaria Estadu Komunikasaun Sosiál (SEKOMS). Hau mós hato’o ba Xefe departamentu TIK-SEKOMS hamutuk ho tekniku sira ne’ebé ho vontade diak to’o mai iha ami nia eskola hodi bele hare koneksaun internet ne’ebé fornese husi Ministériu Transporte no Komunikasaun (MTK) no liu – liu ba Xefe Ekipa tekniku husi SEKOMS ne’ebé tulun ona ami instala buat balun iha komputador liga ho preparasaun ba utilizasaun Jornál Parede Dijitál ne’ebé sei lansa iha pajina Website Escola Secundária Geral 02 Vila Nova Baucau ninian.
Ami mós sente kontente ho prezensa ekipa husi SEKOMS ninia hodi halo Plataforma Website ida ne’e, nu’udar programa piloto ne’ebé selesionadu husi Ministériu Edukasaun no SEKOMS. Hein katak ho ezistensia Jornál Parede Dijitál ida ne’e estudantes no professores husi ESG 02 Vila Nova Baucau bele aproveita didiak Pajina ida ne’e hodi bele espresa koñesimentu no kreatividade ne’ebé iha.
Liu husi pajina Website ida ne’e nu’udar meios ida ne’ebé importante hodi ajuda estudante sira bele espresa sira nia konesementu, talentu ne’ebé hafasil sira hodi bele fahe no simu ho lais informasaun sira. pajina Website ida ne’e mós nudar meios ida atu kanaliza informasaun ne’ebé lais liu – liu ba estudantes, inan – aman , professores no publiku tomak bele asesu informasaun kona-ba andamentu prosesu aprendijazen, progressu sira no mós informasaun sira ne’ebé sai hanesan valor promosaun hodi atrai estudante sira seluk hodi hola parte iha ESG 02 Vila Nova Baucau.
Pajina Website ida ne’e mós nu’udar meios ida atu transmite mensajen no informasaun kona-ba atividades hotu ne’ebé liga ho prosesu tomak inklui atividade kurikuler no estrakurikulár ne’ebé implementa iha ESG 02 Vila Nova Baucau.